D'groussherzoglech Famill

De Prënz Félix vu Bourbon-Parma

Gebuer

28. September 1893

zu Schwarzau am Steinfeld, Éisträich

Le Prince Félix

© Kollektioun Maison grand-ducale de Luxembourg

Biografie

De Prënz Félix, Prënz vu Lëtzebuerg, Prënz vu Bourbon-Parma, gouf de 6. November 1919 den éischte Prince consort, wéi hien d'Grande-Duchesse Charlotte vu Lëtzebuerg bestuet huet. Si hate sechs Kanner:

  • Den Ierfprënz Jean;
  • d'Prinzessin Elisabeth;
  • d'Prinzessin Marie-Adélaïde;
  • d'Prinzessin Marie-Gabrielle;
  • de Prënz Charles;
  • d'Prinzessin Alix.

Hien ass den 8. Abrëll 1970 zu Fëschbech gestuerwen.

Le Prince Félix de Bourbon-Parme
© Kollektioun Maison grand-ducale de Luxembourg

Portrait vum Prënz Félix vu Bourbon-Parma

La Grande-Duchesse Charlotte et le Prince Félix

Fir méi iwwer d'Grande-Duchesse Charlotte gewuer ze ginn

Kandheet a Jugend

De Félix Marie Vincent vu Bourbon war dat sechst vun zwielef Kanner, Jong vum leschten a verbannten Herzog Robert vu Parma aus dem Haus Bourbon, dee bis 1860 regéiert huet, a senger zweeter Fra, der Herzogin Maria Antonia vu Bragança, Infantin vu Portugal, eng jénger Schwëster vun der Grande-Duchesse Marie Anne.

De Prënz Félix huet verschidden Internater an Éisträich an England besicht, wou hien 1913 säin Ofschloss gemaach huet.

Wärend dem Éischte Weltkrich huet hien mat zwee vu senge Bridder de Militärdéngscht an Éisträich gemaach, wärend zwee vu sengen anere Bridder an der belscher Arméi aktiv waren. Als éischte Leutnant huet de Prënz Félix säi Schwoer, de Keeser Karl vun Éisträich, am Joer 1917 virum Erdrénke gerett.

No senger Verlobung mat der Prinzessin Charlotte am November 1918 huet hie säin Déngscht als Kapitän vun der Kavallerie an der éisträichescher Arméi opginn.

© Kollektioun Maison grand-ducale de Luxembourg
De Prënz Félix mat senge Geschwëster

Hochzäit mat der Grande-Duchesse Charlotte

Nodeems si de 15. Januar 1919 Groussherzogin gi war, krut de Prënz Félix nom Bestietnes de 6. November 1919 den Titel vun engem Prënz vu Lëtzebuerg. Déi jonk Koppel huet sech zu Schlass Bierg niddergelooss, wou d'Grande-Duchesse Charlotte scho gelieft huet.

Mat Fangerspëtzegefill a Sensibilitéit huet de Prënz Félix et fäerdeg bruecht, sech zu Lëtzebuerg en Numm ze maachen. Hie gouf zum "Colonel honoraire" vun der Compagnie des Volontaires ernannt a war vun 1923 bis 1932 a vun 1947 bis 1969 President vum Lëtzebuerger Roude Kräiz. Vun 1937 bis 1951 a vun 1961 bis 1969 war hie Member vum Staatsrot.

Grand Duchess Charlotte and Prince Felix

Zweete Weltkrich, Zäit vum Exil

Wéinst den internationalen Entwécklungen an den éischten Unzeeche vum Zweete Weltkrich, huet de Prënz Félix am Joer 1939 decidéiert, e méiglechen Exil vun der groussherzoglecher Famill ze plangen. Hien huet éischt Kontakter mam President Roosevelt opgeholl. No Récksprooch mam Ausseminister Joseph Bech huet hien d'Grënnung vun enger Lëtzebuerger Ambassade zu Washington virbereet.

Den 10. Mee 1940 ass hien der Grande-Duchesse an der Lëtzebuerger Regierung an den Exil nogaangen, iwwer Frankräich, Spuenien a Portugal. Am Juli ass de Prënz Félix mat de sechs Prënzekanner an Amerika gereest. Am Oktober koum d'Grande-Duchesse no, éier d'Famill am Dezember op Montreal, Kanada, geplënnert ass, wou d'Prënzekanner bliwwe sinn an hir Studie virugemaach hunn. Am August 1941 ass déi groussherzoglech Koppel op London geflunn an huet sech do fir d'Zäit vum Krich niddergelooss. Déi gutt Relatiounen zu Amerika goufen 1942 duerch eng sëlleg, vum President Roosevelt organiséiert, Receptiounen am Wäissen Haus gefestegt.

1942 hunn de Prënz Félix an den Ierfgroussherzog Jean decidéiert, sech als Fräiwëlleger der brittescher Arméi unzeschléissen, fir un der Säit vun den Alliéierte fir d'Befreiung vu Lëtzebuerg ze kämpfen. Vun November 1942 un huet de Prënz Félix am Nordkommando vun der brittescher Arméi gedéngt. Am Mee 1944 gouf hien zum Chef vun der Lëtzebuerger Militärmissioun beim Supreme Headquarters Allied Expeditionary Force.

No der Landung vun den Alliéierten an der Normandie war de Prënz Félix bei der Befreiung vu Paräis an den 10. September 1944 bei der Befreiung vun der Stad Lëtzebuerg dobäi. Wärend der Ardennenoffensiv ass hien zu Lëtzebuerg bliwwen an huet d'Alliéiert bei der Verdeedegung vum Land ënnerstëtzt.

De 14. Abrëll 1945 huet hien d'Grande-Duchesse bei hirem triumphale Retour op Lëtzebuerg begleet. Déi groussherzoglech Famill ass dono op Schlass Fëschbech geplënnert. De Prënz Félix war vun 1945 bis 1947 Generalinspekter vun der neier Lëtzebuerger Arméi. Vun 1947 un huet hien d'Grande-Duchesse bei sëllegen offizielle Visitten am Ausland begleet, als lescht bei enger Visitt an Amerika an enger Staatsvisitt zu Paräis am Joer 1963.

Le Prince Félix, le Prince Jean et Winston Churchill
© Kollektioun Maison grand-ducale de Luxembourg

1946: De Prënz Félix, de Prënz Jean an de Winston Churchill zu Lëtzebuerg

Op Schlass Fëschbech

No hirer Ofdankung am Joer 1964 hunn d'Grande-Duchesse Charlotte an de Prënz Félix sech op Schlass Fëschbech zeréckgezunn. Bei der Geleeënheet vun hirer gëllener Hochzäit am Joer 1969 huet d'ganz Land matgefeiert, eng Occasioun fir d'Bevëlkerung, dësen emblematesche Perséinlechkeete vun der Natioun nach eng Kéier d'Éier z'erweisen.

De Prënz Félix gouf an der Fürstengruft vun der Krypta vun der Kathedral vu Lëtzebuerg bäigesat an hie bleift de Lëtzebuerger als ee vun den treisten Dénger vum Land an der Dynastie an Erënnerung.

© Tony Krier / Kollektioun Maison grand-ducale de Luxembourg
D'Grande-Duchesse Charlotte an de Prënz Félix

Fotoe vum Prënz Félix

D'Grande-Duchesse Charlotte an de Prënz Félix © Kollektioun vun der Maison grand-ducale de Luxembourg

D'Grande-Duchesse Charlotte an de Prënz Félix

Déi groussherzoglech Famill © Kollektioun vun der Maison grand-ducale de Luxembourg

Déi groussherzoglech Famill

De Prënz Félix an de Prënz Jean © Kollektioun vun der Maison grand-ducale de Luxembourg

De Prënz Félix an de Prënz Jean

De Prënz Félix, de Prënz Jean an de Winston Churchill © Kollektioun vun der Maison grand-ducale de Luxembourg

De Prënz Félix, de Prënz Jean an de Winston Churchill zu Lëtzebuerg

De Prënz Félix © Kollektioun vun der Maison grand-ducale de Luxembourg

De Prënz Félix

De Prënz Félix © Kollektioun vun der Maison grand-ducale de Luxembourg

De Prënz Félix

D'Grande-Duchesse Charlotte an de Prënz Félix © Kollektioun vun der Maison grand-ducale de Luxembourg

D'Grande-Duchesse Charlotte an de Prënz Félix

Déi groussherzoglech Famill © Kollektioun vun der Maison grand-ducale de Luxembourg

Déi groussherzoglech Famill

De Prënz Félix © Kollektioun vun der Maison grand-ducale de Luxembourg

De Prënz Félix

 

Fir méi gewuer ze ginn :

La Grande-Duchesse Charlotte et le Prince Félix

Fir méi iwwer d'Grande-Duchesse Charlotte gewuer ze ginn