D’protokollaresch Reegele vum Haff

Usproochsformen

De Respekt vis-à-vis vun der Monarchie als Institutioun kënnt och am Gebrauch vun den traditionellen Urieden zum Ausdrock. Et gëtt dowéinst recommandéiert, d’Membere vun der Famill esou ze adresséieren:

• Beim Grand-Duc, beim Ierfgroussherzog oder bei all männlechem Member vun der Famill mat der Usprooch “Monseigneur” oder “Altesse Royale”.
• Bei der Grande-Duchesse, bei der Ierfgroussherzogin oder bei all weiblechem Member vun der Famill wärend dem éischte Gespréich mat “Altesse Royale”, duerno am Laf vun der Konversatioun mat “Madame”.

Dës Urieden ënnersträichen de Respekt, deen der Funktioun zousteet, a si gëllen an allen offiziellen, diplomateschen oder representative Uläss.

Zu Lëtzebuerg gëtt zwëschent zwou Hymnen ënnerscheet, déi all hiren eegene Gebrauch hunn:

• Ons Heemecht : Dëst ass d’Nationalhymn. Si gëtt bei offiziellen Zeremonien, commemorativen Evenementer oder sportleche Manifestatioune gespillt, onofhängeg dovun, ob de Staatschef dobäi ass oder net.

• De Wilhelmus : Dëst ass d’Hymn vun der groussherzoglecher Famill, zu Éiere vum Guillaume I. vun Oranien-Nassau, enger Grënnerfigur vum Haus Oranien-Nassau, déi historesch enk mat der groussherzoglecher Famill verbonnen ass. Se gëtt exklusiv an der Präsenz vu Membere vun der groussherzoglecher Famill gespillt, fir hir Arrivée oder hiren Depart bei engem Evenement unzekënnegen, wéi z. B. bei enger offizieller Zeremonie oder engem Concert.

Faarwen

D’Monarchie zu Lëtzebuerg zeechent sech duerch hir eegen heraldesch Faarwen - orange a blo - aus, déi sech vum nationale Fändel (rout-wäiss-blo) ënnerscheeden.

Bei offiziellen Evenementer sinn dës Faarwen ë. a. op de Nummereschëlder vun de Gefierer am Cortège vun der Maison du Grand-Duc ze gesinn, déi vum Transportministère speziell autoriséiert gi sinn.

D’Wopen

• D’Staatswope symboliséieren d’ëffentlech Autoritéit. Si ginn op offiziellen Gebaier (z. B. Ministèren, Ambassaden) an op staatlechen Dokumenter (z. B. Gesetzer, Päss ) benotzt.
• De Wope vum Grand-Duc ënnersträicht déi konstitutionell an dynastesch Roll vum Staatschef vu Lëtzebuerg. Et gesäit een dëse Wopen op senge Residenzen (z. B. am Palais), op Dokumenter déi direkt vum Staatschef kommen (z. B. lettres de créances) oder bei offiziellen Zeremonien, un deenen hien als Staatschef deelhëlt (z. B. um Fändel vu sengem Auto un der Spëtzt vum Cortège).

Wéi a ville Länner och erkennt een zu Lëtzebuerg d’Presenz vum Staatschef an de Residenzen duerch den Nationalfändel um Daach vum Gebai:

• um Schlass vu Colmar-Bierg, senger Residenz, wann de Grand-Duc sech am Land ophält;
• um groussherzogleche Palais, senger Aarbechtsplaz, wann hie physesch am Palais ass.

Zwou Prezisiounen am Zesummenhang mam groussherzogleche Palais:

• An enger Lieutenance-Period gëtt de Lëtzebuerger Fändel opgehaangen, wann de Lieutenant-Représentant am Palais ass.
• Wärend enger Staatsvisitt ass de Fändel vum invitéierte Land.

Am Grand-Duché gëtt et eng Rei vun Auszeechnungen, dorënner déi véier grouss Uerden:

• Ordre du Lion d’or de la Maison de Nassau
• Ordre de Mérite civil et militaire d’Adolphe de Nassau
• Ordre de la Couronne de chêne
• Ordre de Mérite du Grand-Duché de Luxembourg

De Grand-Duc ass de Groussmeeschter vun dësen Uerden, den héchste Rang an der Hierarchie vun engem ordre de chevalerie, zivil oder militäresch.

D’Maréchale de la Cour ass d’Kanzlerin vum Ordre du Lion d’or de la Maison de Nassau an och vum Ordre de Mérite civil et militaire d’Adolphe de Nassau.

De Staatsminister, Chef vun der Regierung, ass de Kanzler vum Ordre de la Couronne de chêne an och vum Ordre de Mérite du Grand-Duché de Luxembourg.