01.02.2026

8. Editioun vum "Western European Model European Parliament"

Dëse Sonndeg war d’Zeremonie fir den Optakt vun der 8. Editioun vum « Western European Model European Parliament » (WEMEP), a Presenz vum Grand-Duc a vum Minister Xavier Bettel.

De Programm « Model European Parliament » gouf 1994 lancéiert, fir Jonker ze encouragéieren, sech fir international Froen an de Fonctionnement vun der EU ze interesséieren.

Des Editioun gëtt vu Schülerinnen a Schüler aus dem Lycée Aline Mayrisch organiséiert a bréngt wärend fënnef Deeg Jonker aus Däitschland, der Belsch, Dänemark, Irland, Lëtzebuerg, Portugal a Schweden zesummen. Si beliewe parlamentaresch Debatten zu aktuelle gesellschaftlechen a politeschen Erausfuerderungen a ginn dobäi vun Experten ënnerstëtzt. Déi ugeholl Resolutioune ginn duerno un d’Europäescht Parlament weidergeleet.

D’Zukunft vun de Jonken ass e wichtegt Uleies fir de Staatschef. Hien gratuléiert de Schülerinnen a Schüler fir d’ Virbereedungsaarbecht vum WEMEP, deen hir Dynamik an hiert Engagement ënnersträicht, fir hir eegen Zukunft an déi vun Europa vir ze bereeden a mat ze gestalten.