Respekt a mënschlech Dignitéit | D’groussherzoglech Koppel op Besuch bei ATD Quart Monde Luxembourg

Am Laf vun der Visitt hunn d’Membere vun der Associatioun der groussherzoglecher Koppel déi verschidden Aktivitéite vun ATD virgestallt, mat deenen d’Associatioun géint d’Aarmut virgeet, d’Rechter vu Mënschen a prekäre Liewenssituatioune verdeedegt an sech fir de Respekt vun der mënschlecher Dignitéit asetzt. D’Associatioun engagéiert sech dobäi besonnesch an de Beräicher Zougang zu der Kultur, Bildung a Sensibiliséierung vun der Ëffentlechkeet. Eng zentral Roll spillt dobäi d’Bedeelegung vun deene Mënschen, déi selwer vun Aarmut betraff sinn.

Bei de Gespréicher goufen och d’Erausfuerderungen ugeschwat, mat deenen d’Associatioun, hir Mataarbechter an hir Benevollen an hirer deeglecher Aarbecht konfrontéiert sinn. De Grand-Duc an d’Grande-Duchesse hunn hiren Asaz fir eng méi gerecht a méi solidaresch Gesellschaft gewierdegt.