D'Grande-Duchesse besicht den dropIn, de Service médico-psycho-social fir Sexaarbechter a Sexaarbechterinnen

Am Respekt vun der Anonymitéit an ouni ze jugéieren, bitt dës Struktur, zënter hirer Grënnung am Joer 1998, Sexworker e séchert a vertrauensvollt Ëmfeld. Si kënnen hei op eng breet Pallett u gratis Servicer zréckgräifen, déi hinnen et erméiglecht hir Gesondheet ze schützen an eng sozial Ausgrenzung ze bekämpfen.

Eng sozial a juristesch Begleedung, medezinesch Consultatiounen an d’Bereetstelle vun engem Rou-Raum stinn am Mëttelpunkt vun dësem Dispositif. Iwwer de Programm EXIT ënnerstëtzt den dropIn och déi Persounen, déi de Milieu verloosse wëllen, an hëlleft hinnen en neit Liewen unzefänken.

Den Asaz vun den Equippe geet och op der Strooss weider, wou si duerch hir Präsenz um Terrain Sensibiliséierungsaarbecht am Beräich vun der Präventioun leeschten an op d’Offer vum dropIn opmierksam maachen.