De Grand-Duc Guillaume, Prënz vu Lëtzebuerg, Prënz vun Nassau a vu Bourbon-Parma, gebuer den 11. November 1981, ass den eelste Jong vum Grand-Duc Henri an der Grande-Duchesse Maria Teresa vu Lëtzebuerg. Seng Bridder a Schwëster sinn de Prënz Félix, de Prënz Louis, d’Prinzessin Alexandra an de Prënz Sébastien.

De Prënz Guillaume ass de 7. Oktober 2000 beim Trounwiessel vu sengem Papp offiziell zum Ierfgroussherzog ernannt ginn. Den 8. Oktober 2024 ass hien zum Lieutenant-Représentant vum Grand-Duc Henri ernannt ginn. Den 3. Oktober 2025 leet hien, nom Ofdanke vu sengem Papp, den Eed of a gëtt Grand-Duc vu Lëtzebuerg.

De 26. Abrëll 2012 ginn de Grand-Duc an d'Grande-Duchesse d'Verlobung vum Prënz Guillaume mat der Gräfin Stéphanie de Lannoy bekannt.

D'Hochzäit gëtt den 20. Oktober 2012 an der Kathedral Notre-Dame vu Lëtzebuerg gefeiert. D'Gräfin Stéphanie gëtt domadder Prinzessin an Ierfgroussherzogin vu Lëtzebuerg. Si gëtt den 3. Oktober 2025 beim Trounwiessel vun hirem Mann Grande-Duchesse.

De Prënz Guillaume ass zu Luerenzweiler an d'Primärschoul gaangen. Seng Studien huet hien am Lycée Robert Schuman zu Lëtzebuerg ugefaangen, éier hien duerno am Alter vu 16 Joer op den Institut Le Rosey souwéi op de Collège Alpin Beausoleil an der Schwäiz gaangen ass, wou hien 2001 säin Ofschlossdiplom krut. De Prënz Guillaume schwätzt fléissend Lëtzebuergesch, Franséisch, Däitsch, Englesch a Spuenesch.

No engem Studium vun internationaler Politik an England mécht hie weider Studien a Frankräich, wou hien 2009 eng duebel Lizenz mat Auszeechnung an de Fächer Literatur- a Politikwëssenschaften op der Universitéit Angers kritt.

Parallel zu sengen Universitéitsstudien huet de Prënz Guillaume sech duerch verschidde Coursë mat der wirtschaftlecher a politescher Welt vertraut gemaach. Hien huet an deem Kader och Stagë bei multinationalen Entreprisen, sou zum Beispill 2003 bei der Union chimique belge an 2004 bei der Deutsche Bank zu London gemaach. Am Joer 2005 gouf huethien an déi di verschidden Aktivitéite vun der spuenescher Néierloossung vum Grupp ArcelorMittal agefouertkenne geléiert. De Prënz Guillaume bereet sech als Trounfollger op seng spéider Roll vir. Sou hëlt de Prënz Guillaume 2005 mam Premierminister a mam Ausseminister un der Millenium Conference vun de Vereenten Natiounen zu New York deel, där hiert Zil d'Eliminatioun vun extreemer Aarmut an der Welt war.

Duerch en Openthalt bei der europäescher Kommissioun a bei der permanenter Vertriedung vu Lëtzebuerg zu Bréissel am Joer 2012, konnt de Prënz seng Kenntnisser iwwer de Fonctionnement vun der Europäescher Unioun, de Verhandlungsprozesser an den institutionellen Ofleef verdéiwen. Hien huet ënner anerem um Conseil des affaires étrangères an um Comité politique et de sécurité (COPS) deelgeholl.

Vun 2018 bis 2019 absolvéiert de Prënz Guillaume e Studiegang um Royal College of Defence Studies (RCDS) zu London, fir zousätzlecht Fachwëssen en vue vu sengen zukünftegen Aufgaben als Staatschef ze kréien an domadder beschtméiglechst op seng spéider Responsabilitéite virbereet ze sinn.

Gläichzäiteg huet de Prënz Guillaume ugefaangen, senge Representatiounsflichten nozegoen.

Dobäi geet et zemools ëm d'Promotioun vu Lëtzebuerg am Ausland, awer och ëm d'Ënnerstëtzung vu Betriber a Wirtschaftsinitiativen hei am Land. Am Mäerz 2001 huet de Prënz Guillaume d'Éierepresidence vum Board of Economic Development vum Grand-Duché ugeholl, enger Agence fir Wirtschaftsfërderung an –entwécklung, déi haut Trade & Investment Board heescht. Zanter 2004 iwwerreecht hien d'Auszeechnung Luxembourg-American Business Award zu New York.

Am Alter vun 19 Joer presidéiert hie schonn seng éischt Wirtschaftsmissiounen, déi hien an d'Republik Korea, an Italien souwéi an Amerika gefouert hunn. Hie gëtt reegelméisseg agelueden, de Grand-Duché op wirtschaftlechen a finanzielle Prospektiounsmissiounen am Ausland ze vertrieden, déi hien a sëlleg Länner an Europa, Amerika, Asien an Afrika féieren.

E rezente symbolesche Moment war 2024 d’Aweiung duerch de Prënz vun der éischter Editioun vu « NEXUS2050 », dem groussen Tech-Event zu Lëtzebuerg. D’Start-up-Ekonomie ass e Secteur, deen de Prënz mat vill Opmierksamkeet suivéiert.

Zanter lo scho 50 Joer gëtt déi feierlech Zeremonie vun der Iwwerreechung vum Meeschterbréif vun der Handwierkerkummer vun engem Member vun der groussherzoglecher Famill presidéiert. Eng Éier, déi dem Prënz Guillaume zanter 2004 zousteet. De Prënz ass donieft och zanter 2015 bei der Diplomiwwerreechung vun der Handelskummer dobäi.

Wärend 20 Joer, vu Juni 2005 bis Oktober 2024, war den Ierfgroussherzog Member vum Staatsrot, eng Funktioun, op déi hien am Kader vu senger Ernennung zum Lieutenant-Représentant am Oktober 2024 verzicht huet. Virdrun huet hie reegelméisseg un de Plenarsëtzungen an och un de Sëtzunge vu verschiddene Kommissiounen deel geholl, wat him erméiglecht huet, seng Kenntnisser iwwer déi institutionell a legislativ Ofleef am Land ze verdéiwen an sech op seng zukünfteg Roll als Staatschef virzebereeden.

Säit senger Nominatioun zum Ierfgroussherzog huet de Prënz Guillaume déi groussherzoglech Koppel op sëlleg representativ an institutionell Aktivitéite begleet, wéi op d'Feierlechkeeten am Kader vum Nationalfeierdag, d'Neijooschaudienzen, déi den nationalen Autoritéiten accordéiert goufen, souwéi op vill Staats- an offizielle Visitten.

Am Ufank vu senger Lieutenance am Oktober 2024 huet den Ierfgroussherzog vu sengem Papp och d’Akkreditatiounszeremonien vun den Ambassadeuren iwwerholl, déi d’offiziell Unerkennung vun diplomatesche Vertrieder aus dem Ausland duerstellen.

De Prënz mécht sech fir d’Erënnerungskultur staark. Inspiréiert vun den Erzielunge vu sengem Grousspapp, dem Grand-Duc Jean, deen zesumme mat den alliéierten Truppen an der Normandie gelant war, interesséieren d’Gedenkfeieren zum Zweete Weltkrich hien ganz besonnesch.

D'Fërderung vun der Lëtzebuerger Handwierkskonscht ass ee Beispill dofir. Zesumme mat senger Fra, der Grënnerin an Éierepresidentin vun der ASBL De Mains de Maîtres, setzen si sech fir d'Promotioun vum Lëtzebuerger Konschthandwierk an.

Nieft de wirtschaftlechen Aktivitéite bedeelegen de Grand-Duc an d’Grande-Duchesse sech aktiv um kulturelle Liewen zu Lëtzebuerg. Si gi reegelméisseg op Concerten, Salonen a bei Kënschtlerkreesser oder besichen Ausstellungen a verschiddene Lëtzebuerger Muséeën a bei Acteure vun der lëtzebuergescher Kulturzeen.

Vu sengem Grousspapp a Papp ass de Prënz Guillaume encouragéiert ginn d'Natur ze entdecken an ze protégéieren. Hien ass zanter senger Kandheet Member vun de Scouten.

Am Summer 1997 huet hien als jonke Scout mat vill Begeeschterung un engem humanitäre Camp am Nepal deelgeholl, vun deem him onvergiesslech Erënnerunge bleiwen. Hien huet do un engem Opforstungsprojet souwéi un aneren Aktiounen zu Gonschte vun den am meeschte benodeelegte Communautéite matgeschafft.

Zu Lëtzebuerg huet de Prënz Guillaume mat Houfert den Titel vum Chef-Scout nom Doud vum Grand-Duc Jean, deen dësen Titel zanter 1945 gedroen huet, iwwerholl an huet säi Verspriechen am Oktober 2019 viru bal 3.000 Scouten am Stater Park ofgeluecht, en Engagement, dat hien och als Grand-Duc bäibehält.

Och um internationale Plang engagéiert sech den zukünftege Grand-Duc Guillaume fir de weltwäite Scoutismus.

2017 ass hien an de Verwaltungsrot vun der World Scout Foundation (WSF) agetrueden a war vu September 2021 bis Oktober 2023 President vun der Fondatioun. Mat senger Assermentatioun als Grand-Duc huet de Prënz Guillaume säi Mandat am Verwaltungsrot vun der WSF ofginn, fir d’Joer drop d’Funktioun vum Éierepresident vun der Fondatioun vum Kinnek vu Schweden, Carl Gustaf, z'iwwerhuelen.

De Prënz Guillaume ass frou mat souwuel klassescher wéi moderner Musek. Hien ass passionéierte Gittarspiller. Als Kand war hie Member vum Pueri Cantores Chouer vu Lëtzebuerg.

De Prënz Guillaume begeeschtert sech fir Sport am Allgemengen, virun allem awer fir Tennis, Schifueren, Schwammen a Waassersport.

Vum Groussherzog Jean huet de Prënz Guillaume d'Léift zur Natur geierft, an där hie gären Zäit verbréngt. Ëmmer erëm hunn hien d'Erzielunge vu sengem Grousspapp an de Bësch ronderëm d'Fëschbecher Schlass gefouert. Déi groussherzoglech Koppel huet sech zum Zil gesat, hirem Jong, dem Prënz Charles, dës Léift fir d'Natur weiderzeginn.