D'Grande-Duchesse Maria Teresa ass eent vu véier Kanner vum Här José Antonio Mestre a senger Fra Maria Teresa Batista-Falla de Mestre.

De 14. Februar 1981 huet d'Maria Teresa Mestre den Ierfgroussherzog Henri an der Kathedral Notre-Dame vu Lëtzebuerg bestuet. Aus hirem Bestietnes gi véier Jongen an eng Duechter ervir:

• de Grand-Duc Guillaume (1981) 
• de Prënz Félix (1984),
• de Prënz Louis (1986),
• d'Prinzessin Alexandra (1991),
• de Prënz Sébastien (1992).

De 7. Oktober 2000 gouf den Ierfgroussherzog Henri Grand-Duc vu Lëtzebuerg. Säitdeem dréit d'Prinzessin Maria Teresa den Titel "Grande-Duchesse vu Lëtzebuerg".

D'Grande-Duchesse Maria Teresa ass Groussmamm vu sechs Enkelen an zwou Enkelinnen:

• de Prënz Charles (gebuer den 10. Mee 2020) an de Prënz François (gebuer de 27. Mäerz 2023), de Jong vum Grand-Duc Guillaume an der Grande-Duchesse Stéphanie,
• d’Prinzessin Amalia (gebuer de 15. Juni 2014) an de Prënz Liam (gebuer den 28. November 2016), déi zwee Kanner vum Prënz Félix an der Prinzessin Claire vu Lëtzebuerg,
• de Prënz Gabriel (gebuer den 12. Mäerz 2006) an de Prënz Liam (gebuer den 21. September 2007), déi zwee Jonge vum Prënz Louis vu Lëtzebuerg,
• d’Victoire (gebuer den 14. Mee 2024), d‘Duechter vun der Prinzessin Alexandra vu Lëtzebuerg an dem Här Nicolas Bagory.

Schonn a fréie Jore gouf d'Grande-Duchesse Maria Teresa fir sozial an humanitär Problematike sensibiliséiert, sou wéi dat an der Famill Traditioun ass. Hir Grousselteren Agustin Batista Y Gonzalez De Mendoza a Maria Teresa Falla Y Bonet hu sech schonn aktiv u philanthropeschen a kulturellen Aktivitéiten op Kuba bedeelegt. Hirem groussen Asaz ass ënner anerem d'Aféiere vu Gesondheetsämter, déi a benodeelegte ländleche Géigende gratis medezinesch Versuergung ubidden, ze verdanken. Hir Grousselteren hu sech och un der Grënnung vum Philharmoneschen Orchester vun Havanna bedeelegt a ware bis zur kubanescher Revolutioun deenen hiren Haaptsponsor.

Wéinst der Revolutioun vum Fidel Castro huet déi jonk Maria Teresa Mestre 1960 mat hiren Eltere José Antonio Mestre a Maria Teresa Batista-Falla de Mestre an hire Geschwëster Kuba verlooss. D'Famill mat spuenesche Wuerzelen huet sech zu New York néiergelooss, wou d'Grande-Duchesse Maria Teresa d'Marymount School besicht huet.

Vun 1961 u war si op der  École Française zu New York. Am Juni 1965 ass d'Famill fir e puer Méint op e Familljesëtz am spuenesche Santander geplënnert, éier si sech definitiv zu Genf néiergelooss huet. Genau wéi hir Geschwëster Antonio, Luis a Catalina huet och d'Maria Teresa eng exzellent Ausbildung gehat. Wärend hire Papp am Finanzberäich aktiv war, huet hir Mamm, déi passionéiert vu Konscht a Literatur war, sech ëm d'Famill gekëmmert an hire Kanner d'Wäerter vum chrëschtleche Glawe bäibruecht.

Vun 1961 un huet si op der  École Française zu New York studéiert. Am Juni 1965 goung d'Grande-Duchesse Maria Teresa fir weider Etüde fir d'éischt an den Institut Marie-José zu Gstaad, dono an d'Internat Marie-Thérèse zu Genf, wou si am Juni 1975 de franséische baccalauréat gemaach huet. An der Tëschenzäit hat si och déi Schwäizer Nationalitéit ugeholl. Nom Secondaire huet si sech op der Universitéit vu Genf ageschriwwen, wou si Politikwëssenschafte studéiert huet. Wärend de véier Joer Studien op der Universitéit huet si hire spéidere Mann, de Prënz Henri vu Lëtzebuerg, kenne geléiert, deen an déi selwecht Coursë gaangen ass.

1980 kritt d'Grande-Duchesse Maria Teresa hiren Diplom an de Politikwëssenschaften, an de 7. November vum selwechte Joer, no hiren Universitéitsstudien, ass hir Verlobung ugekënnegt ginn.

Zënter hirer Hochzäit am Joer 1981, huet d'Grande-Duchesse Maria Teresa, ënner anerem duerch d'Fondation du Grand-Duc et de la Grande-Duchesse, déi si bis 2025 presidéiert huet, sëllegen Aktiounen zu Gonschte vu Mënschen an Nout zu Lëtzebuerg an an der ganzer Welt lancéiert.

D’Grande-Duchesse Maria Teresa stellt d'Verdeedegung vun der Rechter vu Fraen a Meedercher, souwéi de Kampf géint all Form vu Gewalt géint Fraen an de Mëttelpunkt vun hirem Handelen. Dëst perséinlecht Uleies huet d'Grande-Duchesse Maria Teresa an d'Praxis ëmgesat, andeems si Fraen dozou motivéiert, sech aktiv um Opbau vun enger gerechter Gesellschaft ze bedeelegen, déi op der Würd vum Mënsch an de Wäerter vu Solidaritéit berout.

1997 gouf si fir hiren Asaz fir d'Bildung vu jonke Meedercher, d'Rechter vun de Fraen an d'Mikrofinanzen zur Ambassadrice de bonne volonté vun der Unesco ernannt. 2007 gouf d'Grande-Duchesse Maria Teresa zur Eminent Advocate for Children vun der Unicef ernannt. An deem Kader ënnerstëtzt si d'Intressie vu Kanner op der ganzer Welt.

D'Grande-Duchesse Maria Teresa setzt sech onermiddlech fir Kanner an hir Educatioun an. Am Januar 2016 huet si en Internationale Forum zum Theema Dyslexie organiséiert, fir den Elteren, deenen hir Kanner mat esou Problemer konfrontéiert sinn, nei Hoffnung ze ginn a bei deem hire Fils, de Prënz Louis, iwwer seng eege Legasthenie geschwat huet.

Si schafft zanter drësseg Joer enk mam Professer Muhammad Yunus (Friddensnobelpräis-Laureat 2006) zesummen, engagéiert sech am Beräich vun der Mikrofinanz an Inclusive Finance, a promovéiert déi Theemen zu Lëtzebuerg. Social Business a Fraen am Entrepreneuriat si fir si de Schlëssel zu der Wirtschaft vu muer. 

D'Grande-Duchesse Maria Teresa ass zanter 2006 Éierepresidentin vu LuxFLAG, Luxembourg Fund Labeling Agency, der éischter Agence, déi weltwäit e Qualitéitslabel fir Mikrofinanz-Investmentfonge verdeelt. Zënter 2005 huet si och d'Presidence vun der grousser Internationaler Jury vum Europäesche Mikrofinanz-Präis, deen all Joer eng Initiativ am Beräich vun der Mikrofinanzéierung an der Inclusive Finance an Entwécklungslänner auszeechent.

Hiren humanitären a sozialen Asaz huet d'Grande-Duchesse Maria Teresa dacks an d'Ausland gefouert, wou si sech mat eegenen Aen e Bild vum Fortschrëtt vun de Projete maache konnt, déi si aktiv ënnerstëtzt. Si war am Nepal, Mali, Bangladesch, Thailand, Bosnien, Laos, Kenia, Senegal, Burundi an am Libanon an huet sech ëm Fraen a Kanner an Nout bekëmmert.

Am selwechte Joer huet d'Grande-Duchesse Maria Teresa op enger Rees an de Burundi eng Visitt am Zentralprisong zu Bujumbura, der Haaptstad vum Burundi, gemaach a gouf do vum Schicksal vu Mannerjärege gewuer, déi wéinst klengere Verbriechen inhaftéiert waren. Bannent véier Joer ass et der Fondation du Grand-Duc et de la Grande-Duchesse mat Hëllef vum Maggy Barankitse (Maison Shalom) gelongen, mam Projet de la main tendue 600 Mannerjäreger ze befreien, déi a burundesche Prisongen ënner onmënschleche Konditioune festgehale goufen. D'Kanner hunn, dank dësem Projet, no hirer Fräiloossung psychologesch, juristesch a pedagogesch Ënnerstëtzung kritt.

Am September 2016 ass d'Grande-Duchesse Maria Teresa dem Council of Patronsof the Asian University for Women (AUW) bäigetrueden. D'Universitéit mat Sëtz zu Chittagong, Bangladesch, huet säit hirer Grënnung am Joer 2008 méi wéi 1.200 jonk Meedercher zu Féierungspersounen an Asien ausgebilt.

Besonnesch sensibel fir d'Nout, d'Isolatioun an d'Stigmatiséierung vu Fraen a Meedercher, déi a Krisegebidder Affer vu sexueller Gewalt ginn, huet d'Grande-Duchesse Maria Teresa sech an déi Thematik ageschafft. Si mécht sech zënter 2014 staark fir eng Léisung, an huet Frae begéint, déi esou Iwwergrëff iwwerlieft hunn. 2016 empfänkt d'Grande-Duchesse Maria Teresa d'Gewënnerinne vum Sacharow-Präis Nadia Murad (Friddensnobelpräis-Laureatin 2018) a Lamiya Aji Bachar. Déi zwou jonk irakesch Fraen aus der Communautéit vun de Yeziden maache sech staark fir hir Gemeinschaft a sinn zum Symbol gi fir Fraen, déi Affer vu Gewalt vum Islamesche Staat goufen.

Am Joer 2016 huet d'Grande-Duchesse Maria Teresa den Dr. Denis Mukwege (Friddensnobelpräis-Laureat 2018) getraff. Déif beréiert vu senger Aarbecht huet si d'Initiativ ergraff, mat him a mam Céline Bardet, Grënnerin a Generaldirektesch vun der Associatioun We are not Weapons of War, den internationale Forum Stand Speak Rise Up! am Mäerz 2019 zu Lëtzebuerg ze organiséieren, fir der sexueller Gewalt a Konfliktgebidder en Enn ze setzen. 

Als Deel vun de Virbereedunge fir de Forum huet d'Grande-Duchesse Maria Teresa 2018 eng humanitär Rees an de Libanon gemaach. Si wollt op der Plaz Iwwerliewender vu sexueller Gewalt (Flüchtlingen a Migranten) treffen, hir Leidensgeschichte lauschteren a si bei hirer Sich no Gerechtegkeet a Guttmaachung ënnerstëtzen. Si huet och e Mikrofinanzprojet besicht, deen de Status vu Fraen, virun allem vu Flüchtlingen, verbessere soll.

2020 gouf d'Grande-Duchesse Maria Teresa vun der Nato invitéiert, un engem digitalen Dialog zum Theema sexuell Gewalt a Konfliktgebidder deelzehuelen.

Am Joer 2020 war si Éierepresidentin vum Jury vum Prix de la Femme d'influence, mat deem Fraen ausgezeechent ginn, déi sech an der Gesondheetskris besonnesch ervirgedoen hunn.

Den engagéierten Asaz vun der Grande-Duchesse Maria Teresa fir d'Fraen op der ganzer Welt huet sech an all deene Joren och a sëllegen Aktioune fir d'Fraen zu Lëtzebuerg gewisen. 

Saït 2019 bedeelegt si sech aktiv un der Campagne fir de Start vun der Orange Week zu Lëtzebuerg a gesäit verschidden Associatiounen, déi ënner anerem aktiv sinn am Schutz vun den Affer vun haislecher Gewalt.

Wärend de Covid-19 bedéngte Lockdown-Perioden steet d'Grande-Duchesse Maria Teresa a reegelméissegem Kontakt mat vereenzelten Associatiounen, déi si ënnerstëtzt, sief et duerch Telefonsgespréicher, Videomessagen, déi zur Solidaritéit opruffen, oder duerch d'Participatioun u Campagnen an de sozialen Netzwierker.

Mat der Fondation du Grand-Duc et de la Grande-Duchesse, huet si verschidden Aktioune lancéiert, wéi d'Verdeelung vu Smartphones an Tablets an Heemer, déi sech fir de Schutz vun Affer vun haislecher Gewalt asetzen, mee virun allem och finanziell Hëllefe fir Studenten a prekäre Situatiounen.

2021 engagéiert d'Grande-Duchesse Maria Teresa sech am Kampf géint Gewalt u Fraen a Meedercher bei der Vodafone Foundatioun Luxembourg a bei der ASBL Femmes en Détresse, andeems si d'App Bright Sky ënnerstëtzt, déi den Affer an hire Familljen hëlleft.

Um Social Business Day erënnert si dorun, wéi wichteg et ass, d'Bildung vu Fraen a Meedercher souwéi den Entreprenariat vu Fraen ze ënnerstëtzen, fir déi global Ziler fir eng nohalteg Entwécklung ze erreechen.

Déi héich Auszeechnungen, déi d'Grande-Duchesse Maria Teresa fir hiert humanitäert Engagement kritt huet, sinn d'Unerkennung fir hiert aussergewéinlecht Engagement. Am Oktober 1999 krut si als Ierfgroussherzogin den Éierendoktertitel vun der Seton Hall University (New Jersey, USA).

Am Februar 2003 krut si den Éierendoktertitel vun der Universitéit vu Leon (Nicaragua) an den 13. Juni 2006 huet hir e Vertrieder vum Hellege Stull bei de Vereenten Natiounen de Path to Peace Award iwwerreecht. Dëse Präis gëtt all Joer u Persoune verginn, déi sech duerch hiert humanitäert a soziaalt Engagement ausgezeechent hunn.

Am Joer 2013 krut si vum Veräin ELPIDA den internationale Solidarity Award als Unerkennung fir hiren Asaz fir kriibskrank Kanner.

Den 10. September 2021 gouf si opgrond vun hirem onermiddlechen Asaz fir d'Rechter vu Fraen a virun allem fir hire konkreten Asaz fir Iwwerliewender vu Vergewaltegung als Krichswaff als "Global Champion for the Fight Against Sexual Violence in Conflict" ausgezeechent. Dëse prestigiéisen Titel vun de Vereenten Natiounen ass eng Unerkennung vun hirem Kampf géint Impunitéit a fir d'Verdeedegung vun engem universellen Humanismus, dee fir eng Zukunft a Gerechtegkeet a Fridde steet.

D'Grande-Duchesse Maria Teresa verbréngt immens gären Zäit mat hiren Enkelkanner. Si intresséiert sech och fir dekorativ Konscht an Design an huet an hirer Jugend 18 Joer laang klasseschen Danz studéiert. Si séngt gären, spillt Gittar a geet och gäre mat hiren Hënn spadséieren.

Aus Leidenschaft fir Literatur war si 2016 Member vum Jury fir de Literaturpräis fir historesch Romaner, dem Prix des Princes, zu Paräis.

Am Januar 2019 huet d'Grande-Duchesse Maria Teresa dem Loris Chavanette de Prix de l'Histoire fir säi Buch "Quatre-vingt-quinze, La Terreur en procès" iwwerreecht.