De Grand-Duc Henri, Herzog vun Nassau, Prënz vu Bourbon-Parma, ass den eelste Fils vun de fënnef Kanner vum Grand-Duc Jean an der Grande-Duchesse Joséphine-Charlotte.

De 14. Februar 1981 huet hie sech an der Kathedral Notre-Dame vu Lëtzebuerg mat der Maria Teresa Mestre bestuet.

De 7. Oktober 2000 ass hie Staatschef vu Lëtzebuerg ginn. No 25 Joer um Troun huet hien den 3. Oktober 2025 beim Trounwiessel zu Gonschte vu sengem eelste Jong Guillaume ofgedankt. 

De Prënz Henri huet sech am Institut universitaire de hautes études internationales (HEI) op der Universitéit vu Genf an der Schwäiz ageschriwwen an huet 1980 mat enger Licence de Sciences Politiques seng Studien ofgeschloss. Op der Universitéit huet de Prënz Henri seng zukünfteg Fra, d'Maria Teresa Mestre kenne geléiert.

1989 gëtt de Prënz Henri zum Éiere-Major vum Queen's Royal Parachute Regiment aus dem Vereente Kinnekräich ernannt.

Duerno huet hien eng Rei Informatiouns- a Studiereesen an d’Ausland gemaach, virun allem an Amerika an a Japan.

Tëscht 1980 an 1998 sëtzt de Prënz Henri am Staatsrot, wat et him erlaabt, säi Wëssen iwwer d’Zesummespill vun den institutionellen a legislative Strukturen am Land ze verdéiwen.

Vun 1978 bis 2000 ass de Prënz Henri Éierepresident vum Comité de développement économique. An deem Kader mécht hie Prospektiounsreesen op déi fënnef Kontinenter mam Zil, den Image vu Lëtzebuerg ze fërderen. Esou kann hien aktiv dozou bäidroen, nei kommerziell Marchéë fir Lëtzebuerg ze erschléissen an och Investisseuren unzezéien. Säi Fils, de Prënz Guillaume, huet dës offiziell Funktioun am Joer 2000 iwwerholl. De Grand-Duc Henri setzt sech awer weider fir d’Promotioun vu sengem Land an, zumools wärend de Staatsvisitten.

Am Alter vun 79 Joer huet de Grand-Duc Jean dunn d'Decisioun geholl, no 35 Joer Herrschaft ofzedanken, a sengem eelste Fils den Troun ze iwwerloossen. D'Vereedegung war de 7. Oktober 2000 an der Chamber, wou de Grand-Duc Henri den Eed op den Artikel 5 vun der Konstitutioun ofgeluecht huet: "Je jure d'observer la Constitution et les lois du Grand-Duché de Luxembourg, de maintenir l'indépendance nationale et l'intégrité du territoire ainsi que les libertés publiques et individuelles."

A senger Trounried ass de Grand-Duc op d'Wäerter vun eiser Gesellschaft agaangen an huet betount, datt d'Fundamenter vun eiser Gesellschaft op Solidaritéit, Justiz, Toleranz, Respekt vis-à-vis vum Nächsten a Mënschlechkeet berouen.

Déi éischt Visitte vum Grand-Duc an der Grande-Duchesse no der Vereedegung hu si a Frankräich (9.-10. Oktober 2000) an an Däitschland (11.-12. Oktober 2000) gefouert, wat déi wichteg Relatioun mat deenen zwee Nopeschlänner ervirgehuewen huet. Tëscht Abrëll 2001 a Juni 2002 hunn de Grand-Duc Henri an d'Grande-Duchesse Maria Teresa hir Joyeuses entrées duerch déi 12 Kantone vu Lëtzebuerg gemaach.

De Grand-Duc Henri informéiert sech iwwer all d'Facettë vum Liewen zu Lëtzebuerg duerch Visitte vun Institutiounen, Spideeler, Alters- oder Fleegeheemer, Associatiounen an Ausstellungen. Hie geet op Concerten, akadeemesch Seancen an op Sporteventer.

De Grand-Duc Henri ass Papp vu fënnef Kanner aus dem Bestietnes mat der Grande-Duchesse, a Grousspapp vun aacht Enkelkanner:

• de Prënz Charles (gebuer den 10. Mee 2020) an de Prënz François (gebuer de 27. Mäerz 2023), Fils vum Grand-Duc Guillaume an der Grande-Duchesse Stéphanie,
• d’Prinzessin Amalia (gebuer de 15. Juni 2014) an de Prënz Liam (gebuer den 28. November 2016), déi zwee Kanner vum Prënz Félix an der Prinzessin Claire vu Lëtzebuerg,
• de Prënz Gabriel (gebuer den 12. Mäerz 2006) an de Prënz Noah (gebuer den 21. September 2007), déi zwee Kanner vum Prënz Louis vu Lëtzebuerg,
• d’Victoire (gebuer den 14. Mee 2024), d‘Duechter vun der Prinzessin Alexandra vu Lëtzebuerg an dem Här Nicolas Bagory.

Dem Grand-Duc Henri säi léifsten Zäitverdreif ass d'Literatur, d'klassesch Musek, d'Natur an de Sport: hie geet schwammen, spillt Tennis, fiert Schi a Waasserschi, mécht Seegelsport a fiert gäre Moto. De Grand-Duc Henri geet och op d'Juegd, eng laang Traditioun an der Famill, duerch déi de Wëldbestand an d'Fauna a senge Bëscher gereegelt gëtt.

Trotz engem gutt gefëllte Kalenner wärend an och no sengem Règne, probéiert de Grand-Duc Henri ëmmer, esou vill Zäit wéi méiglech mat senger Famill ze verbréngen; dat si Momenter, déi hien immens genéisst an déi him et erlaben, ze entspanen an nei Kraaft ze fannen.

#BBD0E0 »